Minthang minta Brad Pitt nih Angelina Jolie he an i thennak cu caan sau pi aa uam hnuah a phuan cang. Kum 11 chung an um ti hnuah an i thennak nih vawleicung a hninh dih. Ahohmanh nih aa then ding in an ruah bal hna lomi an i then cu khuaruahhar lo awk a tha lo.
Angelina Jolie nih thennak ca a tial hnuah a chimmi cu 'chungkhar ngandamnak ding caah cun kan i then a hau ko' a ti. An i thennak le an konglam nih social media vialte a rak linhsatter dih. An i thennak ruangah hi chungkhar kongah a si ko nain fiang tein theih khawhmi a um lo.
Vanlawng in an rak zuan lioah Brad Pitt nih ningcang loin a fapa Maddoz a tuahto ruangah an i thennak a si an ti. Angelina Jolie zong nih 'chungkhar kongah kan hmuh ning aa khat kho lo' a rak ti. Cu tiang lawng cu an chungkhar kong kan theihmi a si.
A hnuah report kan theih than tikah 'bia in a siah tuahsernak in a siah Brad Pitt hi fale caah pacan dirhmun a tlai kho lo' ti a si. Kutke thlak a hmang i bia thalo chim a hmang. FBI le US Child Services tiang nih an rak hlat, asinain a sualnak kan hmu lo tiah a kong an rak phih than.
Naite ah GQ Style nih bia an hal i a chimmi cu 'kan i thenmi cu mah le mah harnak pek bantuk a si' a ti. 'Nung bu thih tluk a si' tiah a chim chih. Kan i thennnak hi zudin ruang zong a si. Ka rak luan tuk. Cucu kan buainak cem a si. Kum cheu deng a si cang i kaa nuam ko. Zu ka ding ti lo.
Ka nunnak hi a thum le a kha he a cawh tiah a chim. Zudin ruang bik ah a si ko. Ka rian tam tuk ruang zong a si fawn a ti. Hngakchia he kan um tikah an theih duhmi a tam, an herhmi a tam, an bia ngaihpiak an hau, ka ing kho tawn hna lo. Keimah zong nih fak deuh in ka rak ruah ding a si' tiah a chim. Ref: The Express.