US Federal Appeals Court nih nilini ah President Trump Muslim khamnak cu an nunter than hlei lo. San Francisco i 9th U.S. Circuit Court of Appeals biaceihtu pathum nih lungthin khat in President Trump Muslim khamnak nawl a chuahmi cu kham rih si ko seh tiah biachahnak an tuah than.
Biaceihtu pathum nih biatung an chuahmi cu 'Trump cozah nih tapung kut in thinphang tuk kan sinak tehte an langhter kho lo. Trump nawlchuahmi nunter thannak ding in a ruang kan hmu lo. Khammi ram pasarih nih hin US ah tapung rian an tuannak zong kan hmu lo. Cucaah biaceihtu James Robart nih a phih chungmi biachahnak ah hin kan um ko rih lai' an ti.
President Trump nih thinhung ngaiin a vun phomh colh hna. Kan ramchung himnak caah thinphang a si cang. Supreme Court ah kan i tong hna lai tiah twitter ah a tial. Justice Dapartment lei nih an chimmi cu 'biachahnak an tuahmi kan zoh lio le lam dang in kan kawl than lio a si' an ti. Washington State Attorney General Bob Ferguson nih cun kan state caah teinak ngaingai a si a ti ve.
Governor Jay Inslee nih 'zeitluk in dah caan karlak kham chungmi nih chungkhar a bawmh hna. Chungkhar an i tong than kho hna i, hmun kip in an rak tlung than hna i, an rian cio an tuan kho than hna. President Trump nawlchuahmi nung peng seh law zeitiang dah chungkhar an i then lai i, riantuan kho loin mi tam tuk an um ve hnga' a ti.
Supreme Court ah kal an hau cang. Asinain biaceihtu pariat lawng an si i, liberal 4 le conservative 4 an si. State level biaceihtu biachahnak thiamthiam ah dir than te ko lai tiah zumh a si. Cun caan a kal lai i, ni 90 timi zong a dih mnanh te ko lai a timi zong an um. Ref: VOA News.
Trump Muslim Khamnak Mei Nih Europe A Kaang Kho Lai Maw?
----------------------------------------------