February 28 ah Panglong Conference (Union Peace Conference) tuah a si than cang lai. Party kip an siah hriamtlai bu kip an siah an hngahhlang ciomi a si. Hi ni le caan a phak hlanah a hlankan tein timhnak ngeih ding in timhtuah cio a si.
Asinain cozah lei nih Chin State le Rakhien State ahcun Security ruangah National-Level Political Dialogue nan ngei kho lai lo an vun ti hna tikah CNF upa an siah Party dangdang an siah an thachia ngaingai hna.
Chin National Front vice President Dr. Lian Hmung Sakhong nih cun Panglong Conference hmanh hi kan boycot a hau men te lai tiah lungfak ngaiin a chim. A chimmi cu 'kan mipi he kan i ruah hmasa lo cun zeidah Panglong Conference ah kan chuah pi lai. Kan mipi hna hmailei caah biakhiatu Conference a si lai caah kan caah cun a biapi tuk.
Cucaah kan caah cun national-level political dialogue hi kan thihnak le kan nunnak tluk tein a biapimi a si' tiah a chim. Chin National Democratic Party (CNDP) lei zong in February 8 ah cozah lei nih Chin State ah national-level political dialogue ngei kho ding in a kan onh lomi kong he pehtlai in biatung kan chuah cang tiah CNDP Secretary Salai Ceu Bik Thawng nih Mizzima sinah a chim.
'Hi meeting caah hin timhnak kan ngei dih cang. Hi meeting tuah kho lo ding in timhciammam tein a kan pek lomi a si ko tiah kan ruah' tiah a chim. A chim thanmi cu 'national-level political dialogue hi a biapi tukmi a si. Union Peace Conference hi voi hnih tuah a si cang. January thla ah rak tuah a si i, Daw Aung San Suu Kyi hruaimi cozah thar donnak ding caah a voikhatnak 21st Panglong Conference rak tuah a si.
Political dialogue ngaingai loin hi conference hna hi kan rak tuah. Daihnak ser lioah political tungtlang rak ser ning in hi national-level political dialogues kan tuah awk a si. Hi meeting hi kan tuah ve tung lo ahcun Union Peace Conference tuah hi sullam ngei lo a si ko lai timi kan zumh' tiah a chim chih. Ref: Mizzima.
CNF Upa Chunmang Vialte A Pakpalawng Can Dawh A Si Cang
--------------------------------------