Trump Muslim khamnak nawl a chuahmi hi phunghram he aa kalh maw timi David B. Rivkin Jr le Karen Tumlin bia an i alnak a si.
David B. Rivkin Jr hi President thing Ronald Reagan le George H. W. Bush chan ah Justice Dapartment ah rian a tuanmi a rak si. Karen Tumlin hi National Immigration Law Center and the NILC Immigrant Justice Fund ah director a tuanmi a si.
David B. Rivkin Jr hi President thing Ronald Reagan le George H. W. Bush chan ah Justice Dapartment ah rian a tuanmi a rak si. Karen Tumlin hi National Immigration Law Center and the NILC Immigrant Justice Fund ah director a tuanmi a si.
Karen Tumlin: President Trump nawlchuahmi hi phungning tein ti ahcun palhnak tampi a ngei. A biapi cemmi pahnih ka langhter lai. Pakhatnak, kan ram an rak dirh ah hin cozah nih zumhnak ruangah pumpak thleidannak a ngei lai lo ti a si. Biaknak bu cung zong ah kan federal cozah nih thleidannak a ngei lai lo tiah kan phunghram ah kan tial. Tutan President nawlchuahmi nih an pahnih in a buar.
US luh khawhnak visa a ngeimi zong nawl a chuahmi nih a kham cang hna. A nawlchuahmi ah hin Khrihfami a zawnruahnak fiang tein a lang. Muslim dangdang cu a thleidan cang hna. Pahnihnak, kan hrihhram taktak a simi tluk cio runvennak (equal protection) upadi kan ngeihmi a buar. Kan phunghram ah biaknak ruangah pumpak thleidannak a um lo.
David B Rivkin Jr: President nawlchuahmi nih hin tampi tuah aa tim lo. Ni 90 chung Muslim ram pasarih cu US ah nan lut kho rih lai a ti, aruang cu tapung he aa tlai tukmi an si caah tha tein hlathlainak ding ah caan kan herh rih ti a si ko. Muslim a kham hna ti zong a si lo; a thleidannak ti zong a si lo. A kham chungmi cu ram sarih te lawng an si i, Muslim ram 50 leng a kham lomi an um ko. Pasarih te a thimmi hna ruang cu tapung he aa pehtlaimi an si ruang a si timi cu a fiang tuk.
President nih hi bantuk nawlchuahnak nawl (power) hi a ngei timi hi na philh rua. Phunghram hrimhrim nih a pekmi a si. Pakhatnak, US ramchung ah ramdang mi an lut kho lai maw lut kho lai lo timi nawlngeihnak a tlaitu cu President a si. US caah tihnung a si ko tiah a ruahmi cu ramchung ah lut rih hna hlah seh a ti ahcun khamnak nawl zong a ngei. Cucu Congress nih fiang tein a pekmi a si i, ahohmanh nih hlathlai (review) piak awk tha lomi nawlngeihnak a si.
Hi nawlngeihnak hi US President tampi nih an hman cang. Presidents Bush, President Bill Clinton le President Barack Obama tbk zong nih an hman cang. Pahnihnak, Congress nih nawlngeihnak a pek pinah US President nih then awk tha loin phunghram nawlngeihnak a ngeih thanmi cu ramdang (foreign affairs) le ramchung security kongah hin a si. Mipem chuah-luhnak cung zongah cu nawlngeihnak cu a um. Cucaah president cu a thawng tukmi phungning (legal) hmun ah a dirmi a si.
A donghnak ah, a fek tukmi kan Supreme Court ah a ummi cu kan states -Washington le Mannesota - tbk nih anmah tein tluk-ruang tein kan i rungveng kho ko timi hmalak khawhnak covo an ngei lo. A ramchung mipi runvennak peknak covo zong an ngei lo. State nawlngeihnak cu ri a ngei. US ah nawlngeihnak kan then-cheu ning tungtlang hi a biapi tuk.
Karen Tumlin: President Trump nih nawl a chuahmi hi kan zoh tikah thleidannak lungthin in a tuahmi a si. Campaign lioah a chim lengmang cangmi kha a si. Nawl a chuahmi hi campiagn ah zahpi awktlak bia a kamhmi tlinternak caah a tuahmi a si. Kan phunghram cu hi bantuk thleidannak lungthinput caah a dir lo. Vawleicung ah Muslim hi kan thleidannak hna ding a si lo. Kan thleidan hna ahcun minung cio kan sinak zong kan i cohlan hna lo a si i, kan phunghram zong kan buar a si.
Nawl a chuahmi nih kan ram a kan himter hlei lai lo. Tihnung hmun tu ah a kan chiah deuh lai. Nikhatni i U.S. Court of Appeals for the 9th Circuit ah mi lianngan US upa tampi nih ca an tialmi na hmuh ko khah. President Trump nawlchuahmi hi ramchung security mit in a siah foreign policy mit in a siah thiamcoter awk a tha lo an ti dih.
David B Rivkin Jr: Na chimmi ka cohlang lo. President thing Obama zong nih Iraq refugee a rak kham hna i, a hnuah a luhter than ko hna. President thing Ronald Reagan zong nih Cuban minung cheukhat kha US luhter loin a rak kham ko hna. President nih an zoh i US luhter dingmi minung kha US caah an tha lo an ti ahcun an kham ko hna. President cungah aa hngatmi a si.
President Trump nawl chuahmi nih a kan himter deuh lai maw timi kong cu biaceihtu nih ruah ding a si lo. Political biahalnak kong a si tikah biaceihtu nih cun i thlak hlah seh tiah Supreme Court upadi a si. A ngaingai ti ahcun National Security official upa thing cheukhat zong nih Trump nawlchuahmi hi an doh ko; asinain amah cozah chung upa nih cun an dirkamh ve ko. Cucaah hi thil cu policy kong a si tikah biaceihtu hna nih tlangtlak ding a si lo. Tlangtlak hrim lo ding kha phunghram lungthin a si.
James Dowie: Karen, President nih hi bantuk nawlchuahnak nawl a ngei ko timi biaraldohnak (argument) hi zeitin dah na leh ning a si lai?
Karen Tumlin: President cu siangpahrang a si lo. Phunghram zong a zulh i, Congress nih an sermi mipem upadi zong a zulh ding a si. Asinain President Trump nih cun a nawlngeihnak in rianrang tukin uapdi ah ser a timh. A phichuak cu federal official tiang in zeitin dah kan fianter lai timi ah ah buai dih cang. Hi nawlchuahmi nih hin ramdang mi zong a hmuitinh (target) ah a chiah hna i, ramleng um US miphun zong harnak a pek dih hna. Washington State nih tlangtlak hlah seh law ramchung-ramleng US mipi an tuar tuk lai.
David B Rivkin Jr: Ka biaraldohnak cu, nawl a chuahmi nih hin a tam tukmi Muslim lak i a tlawmpal te lawng Muslim ram sarih lawng a kham hna. A dang in ka chim ahcun Muslim khamnak a si lo. Tapung he aa pehtlaimi an si tiah ram sarih te lawng a kham chungmi hna a si.
Downie: Federal biaceihtu James Robart nih President nawlchuahmi a kham chungmi hi 9th Circuit Biaceihnak nih zeitin dah bia an chahpiak lai ti nan ruah?
David B Rivkin Jr: 9th Circuit Biaceihnak nih Robart biachahnak hi an thahpiak lai tiah ka zumh. Federal biaceihnak thil tuah hi a chambau ngai. 9th Circuit Biaceihnak nih thil hmaan an tuah lai tiah ka zumh i, a rauh hlanah cun bia zong an chah cang lai. Keimah kaa palh i, 9th Circuit zong nih Robart biachahnak an thahpiak lo ahcun Supreme Court nih an thahpiak thiamthiam ko lai timi zumhnak nganpi ka ngei ko.
Karen Tumlin: President Trump nih nawl a chuah hnuah fak piin ramchung ah sandah an piah. Keimah tbk sihni dangdang zong ah court ah kal in phungning lo Trump nawlchuahnak kan doh cio. A ruang cu nawl a chuahmi hi kan ram lungthinput he zong aa kalh i, kan phungning he zong in aa kalh. 9th Circuit nih hi a tihnung tukmi nawlchuah hi an dirter peng ko lai tiah zumhnak nganpi ka ngei ve.
David B Rivkin Jr: ka phunghram kal-um ning ah political kongah buainak, sandahpiah tbk hna hi cu phungning kan timi he aa pehtlai lo tuk. Political kongah kan buainak le sandahpiak tbk hna nih biaceihnak an hnursuang lo hrimhrim. Political biaalnak ding menmen hna caah aa tlakmi a si. Ref: TNYP.
Note: Karem Tumlin biachim hi a chim kho ngai nain muru a ngei lomi a si. Laimi nih kan uar phun ngai a si, asinain a chimmi hi cungpavuan lawng te an si, asinain David B Rivkin Jr baichim cu a hmin bak in a hmin cangmi thei ko a lo. Al awk um loin a muru lawng tein a phomh i, Tumlin cu knockout in a phomh. Kahin a fiang cangmi cu President Trump Muslim khamnak hi a nung colh than lai timi a lang.