Biahaltu: Ka umnak local ah saram zoh khanhnak ah volunteer tein rian ka tuan i, cheukhat saram tuahto ning ka hmuh tikah ka ngaihchia ngai. Saram cungah zaangfahnak ngei loin an hran (cruel) hnawh tuk hna. Bible nih zeitin dah samram kan tuahto ning hna a si lai timi a chim maw? Duh poah in tuahto khawh maw an si ko lai?
Rev. Billy Graham: Saram a ningcang loin tuahto ding in Pathian nih a kan fial lo. Pathian nih van le vawlei le a chungum vialte a ser dih i, an zawn a ruah dih hna. Saram zong an i tel. Pathian nih zeizong te a ser dih in Pathian nih a chimmi cu 'Pathian nih a zoh hna i, a tha' tiah Bible ah kan hmuh.
Bible nih hran (Cruel) lo ding in nawl a kan pek. Saram himnak le ngandamnak ding caah zohkhan ding in nawl a kan pek. Saram hi Pathian thil ser lawng si loin Pathian nih laksawng a kan pekmi vialte lakah aa telmi an si ve. Kan daihthlanh tik hna le kan hran (cruel) hnawh hna tikah laksawng a kan pekmi kha ningcang loin kan volhpamhpiak zong a si i, Pathian thatnak zei kan rel lo le kan upat lo zong a si.
Prophet Ezekiel nih a saram a daithlanhmi hna kha a mawhchiat hna: "sihmanhsehlaw tuu kha nan cawm hna lo. A bami kha thazang nan pe hna lo, a zawmi kha nan hram hna lo, hma a ingmi kha an hma nan menpiak hna lo, a pingah a kalmi kha nan kirpi ṭhan hna lo i a tlaumi kha nan kawl hna lo; cucu vun chim loin annih cu zaangfahnak ngei lo le puarhrang ngaiin nan uk hna" a ti (Ezekiel 34:4).
Pathian nih Israel hruaitu hna caah tahchunnak a lakmi a si nain hruaitu nih a hruaimi tha tein zohkhan zong a hau i, saram ngeitu nih a saram cungah zawnruahnak ngeih a herhnak zong kahin hmuh khawh a si. Pathian nih Amah he aa lo in sermi kan si bantukin Pathian lungput le zawnruahnak ngeih hi a fale kan rian a si. Sual le hran cu Pathian ziaza le lungput in a pialmi an si. Cucaah kan saram zong kan dawt hna i, ningcang tein kan zohkhanh hna ding an si.
Saram cungah zawnruahnak na ngeihmi ka hmuh i kaa lawm. Nangmah na siah na riantuan hawi an siah thazaang pek kan duhmi hna cu Pathian nih zeitluk in dah a sermi thilnung a kan zawnruah timi hi zeitik hmanh ah va philh hlah. Minung tu cu Amah he loin thlarau he a kan ser i, Amah kan thei kho. Asinain a bawipa sinin saram nih pial/tlau an hmanmi naak hmanh in minung hi Pathian sinin kan tlau a fak deuh tawn.
Asinain Pathian nih cun a kan dawt tuk. A thihnak le a thawhthannak thawngin Jesuh Khrih nih Pathiam sinah kir than khawhnak lam a kan serpiak. Na nunnak ah Khrih hi a laicer ah chia law Amah lawng hi ka tuukhaal tu tha bik a si timi philh hlah.
US President Nih Rev. Billy Graham Kong Zeitin An Chim Cio? (Video Link He)
---------------------------------
----------------------------------
------------------------------------